Ríflega 50 punda lax veiddist í Syltefjarðará

Tæplega 53 punda lax veiddist í Syltefjarðará í Finnmörku í norður Noregi.

Alexander Khrustov, rússneskur veiðimaður sem býr í Kirkenes skammt frá landamærum Rússlands, veiddi fiskinn fyrir um mánuði síðan. Frá þessu er greint á vefnum finnmarken.no.

Ekki fylgir sögunni hvaða agn fiskurinn tók en stór var hann. Reyndar er þetta landssvæði, ár við Barentshaf, þekkt fyrir stórlaxa og alls ekki svo óalgengt að þar veiðist laxar sem mælast um og yfir 50 pund.

Khrustov hefur stundað veiðar á þessum slóðum í fimm ár og er þetta ekki fyrsti stórlaxinn sem hann veiðir. Áður hafði hann veitt 37 og 46 punda lax.

Ólíkt því sem þekkist í Noregi og á Íslandi þá salta Rússar frekar laxinn en að reykja hann.