Laxinn kominn í Breiðdalsá

Lax er genginn í Breiðdalsá. Á vef Veiðiþjónustunnar Strengja er sagt frá því að laxateljarinn hafi verið settur í laxastigann við fossinn Efri-Beljanda í dag. Þegar það var gert var að sjálfsögðu kíkt í hylinn og þar sáust tveir vænir laxar.

Laxveiðin í Breiðdalsá hefst ekki fyrr en 1. júlí og eru menn nokkuð bjartsýnir á góða opnun. Þó laxveiðin sé ekki hafin hefur silungsveiðin verið í fullum gangi. Á vef Strengja segir að mikið af bleikju hafi verið niður við ós en hún sé aftur á móti treg til að taka. Urriðaveiðin í efri hluta árinnar hefur aftur á móti gengið vel. Fyrr í vikunni veiddust til að mynda 130 urriðar á einum degi.

trausti@frettabladid.is