100 sentímetra lax í Selá; Góð opnun í Hofsá

Alls komu 13 laxar á land þegar Hofsá var opnuð í gær þar af fékk Vigfús Orrason átta laxa á sína stöng. Orri Vigfússon, faðir Vigfúsar og leigutaki, segir að opnunin í Hofsá sé ábyggilega einhver sú besta í mörg ár. Þá hafi menn haft á orði að lax sé á öllum svæðum í ánni.

Í Selá hafa veiðst um 30 laxar, þar af veiddust átta í gærkvöldi. Andrey V. Tsyganov, sendiherra Rússlands á Íslandi, var við veiðar í ánni í gær og fékk hann þrjá laxa. Þá landaði Jóhannes Baldursson 100 sentímetra laxi sem er sennilega stærsti lax sumarsins til þessa. Stórlaxinn veiddist á Fossbreiðu og tók Sunray Shadow flugu sem var hnýtt í sérstakri útgáfu Helga Þorsteinssonar.

Stórlax í Aðaldal og einn tók púpu í Fljótaá

Annar stórlax kom á land á Núpasvæðinu í Aðaldal en þar veiddi Róbert Haraldsson 95 sentímetra lax á Laxatanga.

Í Fljótaá hefur bleikjuveiðin verið með miklum ágætum. Þá kom fyrsti laxinn í Fljótaá einnig á land um helgina. Sá var 85 sentímetrar og veiddist hann á púpu á sveiðisvæði 4.

trausti@frettabladid.is