Veiddu sjóbirtinga í Skjálfandafljóti

Þrír sjóbirtingar veiddust í Skjálfandafljóti fyrir skömmu. Stefán Sigurðsson, hjá Lax-á sem selur laxveiðileyfi í fljótið í sumar, fór þangað í smá vísindaleiðangur fyrir rúmri viku síðan. Hann fór sérstaklega norður til að leita að sjóbirtingi í fljótinu.

"Við fengum eina þrjá sjóbirtinga, sá stærsti var fjögur til fimm pund en hinir tveir minni," segir Stefán. Þessum árangri hafi þeir félagar náð þrátt fyrir mikinn kulda.

"Það má segja að það sé byrjað að vora en maður gerði sér vel grein fyrir hvað náttúruöflin eru rosalega sterk fyrir norðan. Þarna voru stórir ísjakar, jafnvel ísborgir, upp í sex til átta metra þykkar og umhverfið allt ofsalega fallegt," segir Stefán sem kveðst eiga von á að boðið verði upp á vorveiði í Skjálfandafljóti næsta sumar.

gar@frettabladid.is