Vorveiðin í Elliðaánum byrjar rólega

Vorveiðin fer rólega af stað í Elliðaánum. Fimm urriðar veiddust í Höfuðhyl á fyrri vaktinni í dag.

Þorsteinn Húnbogason, veiðivörður í Elliðaánum, segir óhætt að fullyrða að byrjunin hafi verið mjög róleg. Líklega sé fiskurinn ekki kominn upp í Höfuðhyl en þar veiðist jafnan langmest af urriða á vorin.

Þorsteinn segir að vanir veiðimenn hafi verið á ánni í morgun. Þeir hafi náð að landa fimm urriðum í Höfuðhyl. Sá stærsti var 4,5 pund en hinir voru á bilinu 2 til 4 pund. Fiskarnir veiddust allir á straumflugur. Veiðimennirnir veiddu einnig Ármótin og niður að Breiðholtsbrú en urðu ekki varir þar. Þorsteinn segir að skilaboðin frá þeim hafi verið þau að ekki væri mikið af fiski á ánni að svo stöddu.