Gæti borðað hest

Oft hanna ég einhvern hlut þegar mig vantar eitthvað sérstakt og finn það hvergi í búðum," segir Stefán Pétur Sólveigarson vöruhönnuður sem hefur hannað spagettímæli með hentugum mæligötum.

„Allstaðar var boðið upp á sama kerfið, göt til að stinga spagettíinu í gegnum. Mér finnst það óhentug tækni til að mæla spagettí, það er miklu betra að láta það detta niður í rauf sem maður fyllir upp í." Á mæli Stefáns eru þó ekki bara einfaldar raufar heldur útskorin tákn sem mæla magn fyrir 12 ára og yngri, fullorðinn mann og konu og á endanum er útskorinn hestur.

„Það er fyrir fjóra. Mig langaði til að gera smá leik í kringum þetta og nota máltækið „ég er svo svangur að ég gæti borðað heilan hest," útskýrir Stefán sem sjálfur er mikið fyrir spagettí.

Mælirinn er skorinn út í burstað stál og hvítt og grænt plast. Framleiðslan fer fram á Íslandi og segir Stefán það mikilvægt í hans hönnun. Meðal vara eftir Stefán má nefna kertastjakann Skrauta, Ræðubindið og handspilin Hrútaspilið og Veiðimann svo eitthvað sé nefnt. Þá er von á nýju handspili frá Stefáni fyrir jólin.

„Það heitir Jólakötturinn og er svartapétursspil, tveir og tveir eins jólasveinar og svo einn jólaköttur sem á að reyna að losa sig við. Það kemur í búðir fyrir jólin," segir Stefán en spagettímælirinn er fáanlegur meðal annars í Kraumi, Epal og Mýrinni. Heimasíða Stefáns er solson.is.

heida@frettabladid.is