Óvæntur smellur frá Prins Póló

„Já, þú segir mér fréttir. Það er gaman að heyra að fólk sé að finna ástina í miðbænum um helgar," svaraði Svavar Pétur Eysteinsson, meðlimur hljómsveitarinnar Skakkamanage og Prins Póló þegar Fréttablaðið hafði samband og greindi honum frá því að lag hans „Niðrá strönd" væri að slá í gegn á dansgólfum borgarinnar.

Umrætt lag er komið í nýjan og dansvædda útgáfu plötusnúðanna Margeirs Ingólfssonar og Jóns Atla Helgasonar. Sú útgáfa fyllir dansgólfin og er kandídat í sumarsmell ársins 2011.

„Ég er mjög ánægður með þessa útgáfu af laginu hjá strákunum og það kemur mér ekkert á óvart að þetta slái í gegn enda Margeir og Jón Atli færir menn," segir Svavar og viðurkennir að hann sé svo heimakær að hann hafi ekki stundað skemmtistaðina lengi „Ég er svo mikill innipúki en núna verð ég að fara að gera mér ferð í bæinn og sjá dansinn duna við Niðrá strönd."

Lagið átti upphaflega ekki að fara inn á plötunni Jukk, sem kom út síðasta haust og er fyrsta plata Prins Póló „Saga lagsins svipar örlítið til smellsins Garden Party með hljómsveitinni Mezzoforte en það var líka lag sem átti ekki að fara inn á plötuna en endaði með að vera aðallag sveitarinnar. Niðrá strönd byrjaði á einni nótu og svo kom textinn seinna meir og er í raun bara eitthvað bull sem ég sauð saman," segir Svavar.

„Eigum við ekki að segja að textinn sé eins konar ástarsaga úr gettóinu?," segir breiðhyltingurinn Svavar en lagið má nálgast á tónlistarvefnum gogoyoko.com. -áp