Engar jólagjafir hjá Sálinni

Sálin hans Jóns míns heldur fjölda tónleika í desember og fram yfir áramótin. Jól.is hafði samband við Stefán Hilmarsson söngvara hljómsveitarinnar til að forvitnast um gjafmildi meðlima og æfingarnar fyrir giggin framundan.

„Fyrsta giggið var 10. mars 1988. Síðan eru liðin nokkur ár," svarar Stefán spurður um aldur hljómsveitarinnar og heldur áfram:

„Ég og Gummi vorum með frá upphafi, Friðrik og Jens komu inn ári seinna og loks Jóhann árið 1998."

„Bandið hefur því starfað í núverandi mynd í ellefu ár."

Þurfið þið í Sálinni hans Jóns míns nokkuð að æfa ykkur lengur? „Við æfum nú ekki reglulega, mörg laganna eru í blóðinu og fara ekkert þaðan," segir hann.

„En við höfum í gegnum tíðina sent reglulega frá okkur nýtt efni og þurfum að æfa það."

„Síðan er það nú svo að lögin slípast mikið til á tónleikum og þróast yfir tíma. Tónleikarnir eru þannig í senn æfingabúðir."

Gefið þið hvor öðrum jólagjafir? „Nei, það hefur ekki tíðkast," svarar Stefán.-elly@365.is