Mikil aukning í sleppingum fyrir norðan

Frá því að SVFR kom að leigutöku á urriðasvæðunum í Laxá í Laxárdal og Mývatnssveit hefur hlutfall slepptra silunga margfaldast, en 58% af urriðanum í sumar var sleppt.

Þetta kemur fram í skýrslu árnefndar Stangaveiðifélags Reykjavíkur sem birt verður í heild sinni fyrir aðalfund SVFR í lok mánaðarins.

Af 3,220 urriða veiði í Mývatnsveitinni í sumar var 1,861 þeirra sleppt aftur lifandi í Laxá. Í Laxárdal var veiðin 828 urriðar og var 484 þeirra sleppt aftur eftir viðureign.

Þessi þróun hefur verið nokkuð brött undanfarin ár, en hvort það er vegna þessa eður ei, þá hefur meðalþungi silungsins í Laxá farið vaxandi. Ef veiðin 2011 er borin saman við veiðina í Laxá undanfarin 24 ár er hún um 90% af meðalveiði þessara ára (4543 fiskar). Það má því segja að Laxáin eigi enn eftir að sýna sínar bestu hliðar fyrir félagsmenn SVFR. En það má einnig orða þetta þannig að 2011 er besta veiðiárið frá því að SVFR tók ána á leigu.

Birt með góðfúslegu leyfi SVFR