Af Hítará á Mýrum

Hítaráin hefur í heildina verið nokkuð góð í sumar. Þó svo að laxinn hafi komið seinna en oft áður þá eru veiðitölur vel yfir meðaltali árinnar.

Á hádegi í gær voru komnir af aðalsvæði Hítarár 512 laxar. Þetta er mjög ásættanleg niðurstaða, sér í lagi í ljósi þess að áin datt inn með seinni skipunum. Mest munar um hollin 21-27 júlí sem gerðu stórveiði, en þá skiluðu sér stærstu göngur sumarsins.

Af veiðisvæðinu Hítará II sem inniheldur Grjótá, Tálma, og svæðið ofan Kattarfoss í Hítará, er það að frétta að til bókar hafa verið skráðir 215 laxar. Er þessi veiði að mestu tekin á tvær dagsstangir sem er frábær niðurstaða.

Alls gerir þetta því 727 laxa veiði.

Enn lifir dágóður tími veiðitímans og hvernig sem að haustveiðin fer, þá verður lokatalan góð þetta árið.

Birt með góðfúslegu leyfi SVFR