Góð veiði á Jöklusvæðinu

Góð veiði hefur verið á Jöklusvæðinu undanfarna daga og eru komnir yfir 100 laxar á land.  Meira vatn hefur verið í ánum heldur en á sama tíma og í fyrra ásamt því að fiskgengd hefur verið meiri.

Mikið hefur verið af tveggja ára laxi í Jöklu en líka í hliðaránum.  Sem dæmi um þetta kom einn 94 cm hængur upp úr Fögruhlíðará um daginn og fleiri í þessum stærðarflokk hafa sést í henni ásamt því að stórir laxar hafa verið á sveimi í Kaldá og Jöklu.

Jökla fór snemma í yfirfall í fyrra en vatnsstaðan núna bendir ekki til annars en að áin haldist góð fram í september.  Síðsumarið er spennandi tími þarna á þessu svæði því þá er sjóbleikjan líka komin í árnar og hún getur verið sérlega væn á þessu svæði.