Hanna Guðrún: Við klárum þetta úti

Hanna Guðrún Stefánsdóttir var markahæsti leikmaður íslenska liðsins sem tapaði naumlega fyrir Frökkum í kvöld. Hanna skoraði þrettán mörk í leiknum.

"Maður má vera svekktur í dag. Mér fannst við spila fína vörn, markvarslan var fín og sóknarleikurinn ágætur. Við komum brjálaðar til leiks og ætluðum að vinna þetta. Þetta hefði getað dottið hvoru megin sem var," sagði Hanna Guðrún.

"Áhorfendur voru frábærir og við vildum klára þetta hérna heima, en við eigum annan möguleika," sagði Hanna.

"Það vantaði herslumuninn að klára þetta eftir að við komumst yfir. Það er kannski pínu reynsluleysi, en þetta er auðvitað mjög sterkt lið."

"Nú förum við út og klárum þetta," sagði Hanna.