Ballesteros sér fram á stærstu áskorun lífs síns

Spænski kylfingurinn Seve Ballesteros segist vera á góðum batavegi eftir margfaldan heilauppskurð, en segir að nú standi hann fram fyrir stærstu áskorun sinni í lífinu - að ná heilsu á ný.

Ballesteros lét fjarlægja heilaæxli úr höfði sínu í lok síðasta árs og var um tíma vart hugað líf. Í nýlegu viðtali við spænska blaðið Marca lýsir þessi mikli sigurvegari áfallinu sem hann varð fyrir þegar hann hné niður á flugvellinum í Madrid í október og baráttunni fyrir lífi sínu æ síðan.

"Ég hef náð mér ótrúlega vel en það er langur vegur í að ná heilsu á ný," sagði Ballesteros í samtali við Marca þar sem hann var m.a. myndaður á heimili sínu í norðurhluta Spánar og virtist nokkuð brattur.

"Þetta er eins og lengsti 72 holu völlur heimsins, ég verð að viðurkenna það," sagði þessi 51 árs gamli kylfingur.

"Ég hafði heppnina með mér, sú staðreynd að ég er lifandi er sönnun þess. Ég get gert marga hluti eins og tala og hugsa. Ég var varaður við því að það kæmu tímar þar sem þetta yrði erfitt og það hefur komið á daginn. Þetta verður eins og að vinna sigur á sjötta risamótinu," sagði Ballesteros, sem vann fimm slík á ferlinum.