Enn frestar Woods að ræða við lögreglu

Tiger Woods mun ekki ræða við lögregluna fyrr en í dag en hann lenti í árekstri á föstudaginn þar sem óttast var í fyrstu að hann væri alvarlega slasaður.

Svo reyndist þó ekki vera og var hann útskrifaður af sjúkrahúsinu síðar um daginn.

Woods fór af heimili sínu um miðja nótt og hlaut áverka í andliti er hann ók á brunahana og tré, skammt frá heimili sínu. Það var Elin, eiginkona hans, sem heyrði í slysinu og kom fyrst á vettvang. Hún komst inn í bílinn með því að brjóta eina bílrúðina með golfkylfu og náði að draga Tiger úr bílnum.

Lögreglan hefur Woods ekki grunaðan um ölvunarakstur en vill þó yfirheyra hann vegna slyssins. Það var ekki hægt á föstudagskvöldið þar sem Tiger var þá að hvíla sig.

Lögreglan greindi svo frá því í gær að enn hefði ekki verið hægt að yfirheyra Woods þar sem að umboðsmaður Tiger sagði að hjónin gætu ekki rætt við lögregluna fyrr en á sunnudaginn, í dag.

„Það er óvenjulegt að við höfum ekki fengið að ræða við hann enn," sagði fulltrúi lögreglu.