Madsen tryggði Dönum sigur á Íslendingum

Íslendingar töpuðu þriðja og síðasta leik sínum á æfingamótinu í Danmörku þegar þeir lágu á grátlegan hátt fyrir heimamönnum 37-36. Það var Lars Madsen sem skoraði sigurmark Dana beint úr aukakasti þegar leiktíminn var runninn út.

Leikurinn var jafn og spennandi nánast allan tímann og munurinn var aldrei meiri en 2-3 mörk. Danir komust í 4-2 í leiknum en íslenska liðið seig framúr og var yfir allar götur til hálfleiks þar sem staðan var 19-18 Íslandi í vil.

Danir náðu góðum kafla sitt hvoru megin við hálfleikinn og tóku 4-0 rispu, en um miðbik síðari hálfleiks var staðan enn og aftur jöfn 26-26. Danska liðið virtist vera á góðri leið með að tryggja sér sigurinn þegar skammt var til leiksloka og hafði tækfæri til að ná tveggja marka forystu þegar um mínúta var til leiksloka.

Íslenska liðið náði hinsvegar að jafna metin í 36-36 með mikilli seiglu, en Danirnir fengu aukakast þegar leiktíminn var runninn út. Það var hinn stóri Lars Möller Madsen sem tryggði Dönum sigurinn með þrumuskoti beint úr aukakastinu.

Snorri Steinn Guðjónsson og Guðjón Valur Sigurðsson voru markahæstir í íslenska liðinu með 7 mörk hvor, Róbert Gunnarsson skoraði 6 mörk, Logi Geirsson 5, Arnór Atlason 4 (öll í seinni hálfleik), Einar Hólmgeirsson skoraði 3 og þeir Ólafur Stefánsson, Bjarni Fritzson, Sigfús Sigurðsson og Ásgeir Örn Hallgrímsson 1 hver. Hreiðar Guðmundsson varði í kring um 12 bolta í íslenska markinu og Roland Eradze eina tvo þegar hann kom inn í lokin.

Íslenska landsliðið hlaut því aðeins eitt stig á mótinu og vermdi botnsætið, en Norðmenn höfðu sigur með því að leggja Pólverja í dag.