Heiðar notaði 10 högg á 17. holunni

Heiðar Davíð Bragason, atvinnukylfingur úr GKj, fór illa að ráði sínu á næst síðustu holunni á Bornholm Masters mótinu sem lauk í Danmörku í dag. Þegar hann kom að 17. holu var hann á sléttu pari og í 3. sæti í mótinu. Hann lék hins vegar 17. holuna á 10 höggum og féll við það ofan í 11. sæti.

Hann sló fyrstu tvo boltana af 17. teig út í mittishátt gras og varð því að taka fimmta höggið af teig og náði þá inn á brautina, sem er mjög þröng. Hann fékk síðan par á lokaholuna og lék hringinn á 77 höggum, eða 5 höggum yfir pari. Hann lauk 54 holum á 11 höggum yfir pari.

Heiðar sagði í samtali við Kylfing.is að völlurinn væri fárálegur, eins og reyndar sést á skorinu. Sigurvegarinn var sá eini sem lék undir pari. Brautirnar eru þröngar, með háu mjaðma-háu röffi eða trjágróðri fyrir utan. Það væri vonlaust að finna bolta í röffinu, enda ekki möguleiki að slá hann þar. "Maður þurfti að ná 200 metra höggi af 17. teig og lendingar svæðið var aðeins 25 metra radíus. Ef maður var fyrir utan þennan blett þá var bara víti. Ég sló fimm bolta af 17. teig í dag, en fann þriðja boltann. Það voru margir að leika mjög illa. Einn sem spilaði með mér fyrstu tvo hringina var með forystu eftir fyrsta hring á þremur undir. Á öðrum hringnum í gær týndi hann 8 boltum og hætti keppni," sagði Heiðar.

Hann og Ottó Sigurðsson ætluðu að keppa á öðru móti á Scanplan Tour í Danmörku í næstu viku, en þeir eru hættir við það. Ottó meiddist á úlnlið á fyrsta hring í þessu móti og er enn bólginn, á erfitt með að slá og þarf því að hvíla. Heiðar ætlar að hitta Staffan landsliðþjálfara í Svíþjóð eftir helgi og æfa með honum í nokkra daga. Norðmaðurinn Christian Arnonsen sigraði í mótinu á samtals 9 höggum undir pari. Næsti maður var á 5 höggum yfir pari.

Frétt af kylfingur.is