Birkir Ívar með gegn Serbum

Birkir Ívar Guðmundsson landsliðsmarkvörður í handbolta leikur með íslenska landsliðinu gegn Serbum. Málið var leyst síðdegis í dag. Vafi lék á hvort að Birkir Ívar gæti verið með þar sem lið hans í þýska handboltanum lenti í umspili um sæti í úrvalsdeildinni.

Evrópska handknattleikssambandið og framkvæmdarstjóri HSÍ, Einar Þorvarðarson, sáu til þess að umspilsleikur Lubeck og Dormagen um sæti í þýsku úrvalsdeildinni á næsta tímabili, verði færður.

Fyrri leikurinn verður leikinn næstkomandi fimmtudag, og mun því ekki skarast á við landsleik Íslendinga og Serba þann 9. júní. Birkir Ívar hélt til Tékklands í dag, þar sem Íslendingar leika vináttulandsleik á morgun. Hann mun aðeins leika annan leikinn af tveimur gegn Tékkum, en heldur svo til Þýskalands á miðvikudag til þess að leika með Lubeck en á að vera mættur til Íslands á föstudag í næstu viku fyrir síðari leikinn gegn Serbum sem fram fer hér heima.