Ford býður starfsmönnum lífeyri

Bandaríski bílaframleiðandinn Ford ætlar að gefa 75.000 starfsmönnum fyrirtækisins í Bandaríkjunum kost á að hefja töku lífeyris fyrr en áætlað var. Hverjum þeim sem tekur þessu verða boðin 140.000 bandaríkjadali eða tæpar 9,8 milljónir íslenskra króna.

Ford tapaði 123 milljónum dala eða 8,6 milljörðum íslenskra króna á öðrum ársfjórðungi og gerir fyrirtækið ráð fyrir að tapa 9 milljörðum dala eða tæplega 630 milljörðum króna á árinu.

Nokkur umskipti hafa orðið hjá fyrirtækinu vegna þessa en Bill Ford, langafabarn stofnanda fyrirtækisins, hefur látið af störfum og hefur Alan Mulally, fyrrum forstjóri Boeing, tekið við starfi hans.

Ford hefur sömuleiðis gripið til ýmissa ráða til að hagræða í rekstri. Meðal annars verður sagt upp 30.000 manns og 14 verksmiðjum í Bandaríkjunum lokað á næstu 6 árum. Þá er búist við að allt að 6.000 manns verði sagt upp til viðbótar auk þess sem líkur eru á að fyrirtækið geri breytingar á framleiðslu sinni.

300.000 manns starfar hjá fyrirtækinu um allan heim.