Playstation 3 ekki í góðum málum

Margir markaðssérfræðingar segja að fá fyrirtæki í ár hafi klúðrað málunum jafn gróflega og Sony. Sony átti stærstu hlutdeildina í tölvuleikjamarkaðnum fyrir stuttu, en þar réði Playstation 2 ríkjum. Sony menn spáðu svo þriðju kynslóð leikjatölvunnar miklum vinsældum en allt hefur komið fyrir ekki. Playstation 3 hefur selst illa. Hún hefur verið gagnrýnd fyrir að vera ekki næstum því öllum kostum gætt sem framleiðendur hennar vonuðu og leita æ fleiri á náðir annara fyrirtækja til þess að svala losta sínum í tölvuspil. Nintendo Wii er ótvíræður sigurvegari þessa árs, en hún hefur slegið öllum sölutölum við. Í öðru sæti er Xbox tölvan sem nálgast 10 milljóna eintaka múrinn, og langt á eftir er Playstation 3. Sony menn þurfa því að drífa sig aftur að teikniborðinu og leysa þennan vanda fljótt, áður en það er um seinan, því áður hafa vinsælar tölvur horfið af sjónarsviðinu á svipaðan hátt, til dæmis framleiddu Sega ekki fleiri leikjatölvur eftir að Dreamcast leit dagsins ljós.