Verðmiði kominn á Windows Vista

Bandaríska netverslunin Amazon.com verðleggur Windows Vista, nýjasta stýrikerfi hugbúnaðarrisans Microsoft, á allt frá 399 til 199 bandaríkjadölum, jafnvirði tæplega 30.000 króna. Verðmiði hefur ekki áður verið á stýrikerfinu sem ekki enn er komið út en búast má við að stýrikerfið verði nokkuð dýrara komið hingað til lands með álögðum kostnaði.

Netverslunin er þegar farin að taka niður pantanir fyrir stýrikerfinu þótt nokkuð sé í útgáfudag. Fyrirtækjaútgáfa Windows Vista er væntanleg á haustdögum og er hún næstdýrust, eða á 299 dali, jafnvirði tæplega 20.000 króna. Ódýrasta útgáfa nýja stýrikerfisins, Windows Vista Basic og er fyrir einkatölvur, er svo fyrirhuguð snemma á næsta ári.

Microsoft bindur miklar vonir við að hinn almenni tölvunotandi kaupi Windows Vista Premium, sem Amazon verðleggur á 239 dali. Sú útgáfa stýrikerfisins býður upp á ýmsa afþreyingamöguleika, meðal annars upptöku á sjónvarpsefni. Dýrasta útgáfan er hins vegar Windows Vista Ultimate. Sú útgáfa, sem kostar 399 dali hjá Amazon.com eða tæpar 30.000 krónur, er hugsuð fyrir þá sem vilja stunda fjarvinnu heiman að frá sér en haldið öllum afþreyingamöguleikunum á sama tíma.

Að sögn forsvarsmanna Amazon.com miðast verðið við kaup á stýrikerfinu en uppfærslur á eldri stýrikerfum eru talsvert ódýrari.