Textinn alltaf persónulegur

"Fólk vill gjarnan sjá eitthvað til að styðjast við og gefa sér tíma til að skoða áður en það tekur ákvörðun með boðskortin," segir Þorsteinn Yngvason hjá Stafrænu prentsmiðjunni í Hafnarfirði. Strákarnir í prentsmiðjunni hafa hannað mikið af boðskortum og tekið saman í bók sem viðskiptavinir þeirra geta fengið með sér heim til að skoða. "Kortin eru stöðluð og þarf stundum engu að breyta nema texta, en textinn er alltaf persónulegur," segir Þorsteinn.

Hann segir að auðvitað sé alltaf best að gefa sér tíma í þetta, en hans reynsla er sú að fólk sé yfirleitt alltaf á síðustu stundu. "Ef fólk er búið að ákveða kortið og ekki er löng biðröð í prentvélarnar er yfirleitt hægt að afgreiða kortin með tveggja daga fyrirvara," segir Þorsteinn.

"Fólki finnst þægilegt að geta gengið að hugmyndum að kortum og flestir styðjast við stöðluðu kortin. Auðvitað vilja sumir gera eitthvað öðruvísi," segir Þorsteinn.