Steinhús söguð niður

Byggingarnar sem um ræðir eru gamla Bæjarútgerðin, Norðurstjarnan, skemmur flutningafyrirtækisins Jóna og Eimskipafélagsskemman. Húsnæðið mun þó ekki allt hafna á haugunum því húsnæði Jónanna verður sagað niður og reist aftur annars staðar. "Fyrst og fremst erum við að rífa niður Norðurstjörnuna og Bæjarútgerðina því þau hús er ekkert hægt að nýta," segir Guðjón Halldórsson, verkefnastjóri Bortækni, sem sér um framkvæmdirnar. "Við munum hins vegar taka burðarvirki og þök af skemmunum og flytja til uppsetningar annars staðar. Af heildarmagninu þarna munum við nýta um það bil 4.000 fermetra og trúlegt að ekki hafi áður jafn stórir byggingarmassar verið fluttir í einu lagi." Bortækni hefur langa reynslu af því að rífa niður hús, en ekki jafn langa í að setja þau upp aftur. "Í þessu verkefni stöndum við frammi fyrir því að þurfa að rífa og henda byggingum sem eru fleiri þúsund fermetrar og sumar ekki nema 15 ára gamlar. Það er mikil sóun á verðmætum," segir Guðjón. "Nú þegar við búum yfir aukinni og öflugri flutningatækni kjósum við að flytja það sem er nýtilegt frekar en að henda því í sjóinn. Það er það skemmtilega við þetta. Nú er allt orðið einnota og algengast að henda bara og byggja upp á nýtt. Stysta leiðin í þessu hefði verið að setja jarðýtuna á allt saman. Það er bara engin verðmætasköpun í því. Byggingarnar munu rísa á nýjum stað og þjóna tilgangi sínum í áratugi í viðbót." Einingarnar eru sagaðar niður með vír- og demantssögum og merktar. Á nýja staðnum verður um einhverja steypuvinnu og samsetningu að ræða. Framkvæmdirnar eru á áætlun og Bortæknimenn munu hafa tæmt svæðið í lok apríl. "Húsnæðið verður svo nýtt í það sem það hentar best í og nú þegar hafa fjölmargir aðilar sýnt áhuga á húsnæðinu."