Gjafir til að fagna nýju heimili

Innflutningspartí eru ekki óalgeng hér á Íslandi og myndast hefur sú hefð að gestir og gangandi hafa með sér minni eða stærri gjöf handa stoltum íbúðaeigendum fyrir nýja heimilið. Ungt par í sínu fyrsta húsnæði er sjaldnast vandamál, það vantar yfirleitt allt, en lítil fjölskylda í sinni annarri eða þriðju íbúð er aðeins meira mál. Það er náttúrlega til heill hellingur af búðum með allskyns gjafa- og heimilisvöru en til að gera hlutina einfalda getur verið sniðugt að líta inn í eina af eldri búðum borgarinnar, Þorstein Bergmann á Skólavörðustígnum. Þarna eru til ótrúlegustu vörur, eldgamlir bollar og bakkar í bland við nýjustu tísku af klakaboxi og hristara og allt þar á milli.