Erfði áhugann frá pabba

"Ég útskrifaðist sem iðnhönnuður úr Danmark Design Skole árið 1993. Pabbi er húsgagnameistari og hafði þetta því fyrir mér. Ætli fagið hafi ekki síast inn frá honum," segir Erla Sólveig Óskarsdóttir húsgagna- og iðnhönnuður. Erla hefur starfað í bransanum síðan hún útskrifaðist en hún segir að það taki mjög langan tíma að koma sér áfram í þessu fagi. "Ég hef heyrt að þumalfingursreglan sé um tíu ár þar til maður eigi að geta lifað á þessu. Ætli það sé ekki svoleiðis hjá mér. Það gerist allt óskaplega hægt. Ég hélt aldrei að ég væri þolinmóð en þessi bransi hefur sannað það fyrir mér. Nema kannsi það sé bara neyðin." Þótt faðir Erlu sé á 85. aldursári er hann duglegur að hjálpa henni. "Ég er með vinnustofu hér heima og sit hér í skúrnum og vinn að módelum. Ég byrja oftast á því að gera frumstæðar prufur sjálf áður en ég fæ iðnaðarmenn til að klára dæmið og þá er gott að geta leitað til pabba. Þótt hann sé orðinn þetta aldraður gleymist verkþekkingin greinilega ekki. Hann hjálpar mér við að saga og kennir mér ýmis trikk sem koma oft að góðum notum því hann getur græjað margt á korteri sem ég hef eytt klukkutímum í," segir Erla Sólveig. Lestu ítarlegt viðtal við Erlu Sólveigu í tímaritinu Magasín sem fylgir DV í dag.