Demetra var gyðja uppskeru

Demetra nefnist ný verslun með kristal og handunnar glervörur á Skólavörðustíg 21a. Þar er Björg Blöndal hæstráðandi og það er líka hún sem á heiðurinn af mörgum munum sem til sölu eru. Björg er nefnilega glerkúnstner, nam handbragðið hjá Gler í gegn í Hafnarfirði. Einkum eru það myndir og fígúrur bæði á veggi og í glugga sem Björg hefur verið að búa til. Kristalinn kaupir hún hins vegar lengra að. Hann kemur frá Frakklandi og Slóveníu og þar er um margskonar hluti að ræða; glös, karöflur, vasa, skálar, bjöllur og kertastjaka svo nokkuð sé nefnt. En hvaðan skyldi hugmyndin að nafni búðarinnar vera komin? "Þetta er nafn úr grísku goðafræðinni. Demetra var gyðja jarðargróða og uppskeru," upplýsir Björg.